S Bebbihärz wird windlewaich.
Ändlig wider Morgestraich!!!!
Mit Cortège, Zyschdig, Gässle znacht
Alles, was ys glügglig macht!
Lang hämmer alli miesse warte
Bis mer hänn dörfe duurestarte
Bängg, Glygge, Wääge, Zügli, Gugge
Hänn dütlig zaigt, was ys duet drugge!
Für Pointe, Witz und s Persifliere
Darf me drum alle gratuliere!

Dr Dangg gilt allne guete Gaischter
De Fasnachts-Service-Public-Laischter:
D Drämmler, d Schugger, d Füürwehrmanne
Alli dien ihr zämmespanne
Die guete Gaischter mit de Bääse
Wo s letschte Räppli zämmelääse.
D Saniteet, d Allmändverwaltig
Au s Baudep hilft ys wider gwaltig
Ass d Frau Fasnacht fröhlig  lacht.
Und nit emoll dr Petrus bacht:
Dä hebbt, was Meteo verspricht
Und macht sy Laade drey Daag dicht!

Wie jeedes Johr am Donnschtigmorge
Wämmer jetz alles schön versorge
Und freuen ys, s näggscht Johr im Hornig
Isch z Basel wider rächti Ornig!

S Fasnachts-Comité