Die bekannte BSG-Schnitzelbänklerin «Frau Länzli» hat für hre Kolleginnen und Kollegen einen herrlich träumerischen Adväntskalender herausgegeben – und diesen freundlicherweise auch Basler Fasnacht Online zur Verfügung gestellt. Gerne veröffentlichen wir das Werk hier.

 

 

Die letschti Nacht do hani droimt, i sig e Schnitzelbangg,

wo zmitts grad ufem Minsterplatz, allne Lyt zem Dangg,

mit 24 Helgeblätter, statt d Wiehnacht go verkinde,

s Fieber vo dr Fasnacht perseenlig wott entzinde.

Dää magisch, doll Adväntskaländer zaigt an jedem Daag,

was d Fasnacht uns an Emotione alles schängge maag.

S erste Dirli, äh dr Helge, zaigt mit grossem Graage,

e Waggis mit de Zoggel sitzend ufem Waggiswaage.

Nummer zwai dää sehsch nit vyyl, kunnt ohni gross Gezeter.

Es isch dr farbig lachend, lyycht verträumti Dummipeter.

Dr Spaalebärg duruf do gässlet aine fäälerfrei,

im wunderscheene Vogelgoschdym uffem Helge drei.

Mit intensive Faarbe, moolt dr Sepp bi Nummer vier,

d Ladäärne von re grosse Clique, in dr Hand e Bier.

Verbisse iebt uff Nummer fimf e junge Bursch «dr Irr».

Nach so vyyl Stunde Piccolo, isch äär scho langsam wirr.

Dr Santiglaus bi Nummer säggs faart mit dr «Alte Tante»,

im Chaise-Tesla dure Wald uff Bsuech zu de Verwandte.

Dr Zeedeldichter uff Blatt siibe isch en arme Dropf.

Vo däm vyyle Värslidräggsle raucht em jetzt dr Kopf.

Das wunderscheen Mimösligwächs, entfaltet do ganz sacht,

iire konzentrierti Duft fir Sii, bim Helge acht.

Uffem nyyni gheersch, me meint es sig e Ressligspann,

dr Ueli mit de vyyle Gleggli, s ziet di voll in Bann.

En alti, holzig Basler Drummle losst sich s net lo nää,

und ruesst, als gäb s kai Morge me, elai bi Nummer zää.

Sogar mit gschlossne Auge, schmeggsch und waisch grad, wo de bisch

Helge elf bim Larvemacher, mi ney Larve uffem Tisch.

I hör se scho vo witem, muess durch d Mängi drugge

D Freie ab uff Nummer zwelf, pompöös, mi Lieblingsgugge.

Bim Drizää do formiere sich vo gross bis glai im Glanz

Die neyschti Ussgoob Blaguette, zum Ringelraigedanz

Stolz marschiert e Stänzler vor dr Clique mit Effort

In Uniform, uff Helge vierzää, als Dambourmajor.

Ziible- und au Faschtewaije, gueti Fasnachtskiechli

D Rezäpt findsch uff Blatt fuffzää, vom alte Basler-Biechli.

Was wäri d Fasnacht ohni Määrsch, e Blatt ganz ooni Noote

Arabi, Gässler, Duddelsagg, Bild sächzää tuet s veroote.

Usem Helge sibzää fliege Räppli, wild und frei

Si stopfe männge Bebbi voll und fraie sich am Gschrei.

Blatt achtzää zaigt en Altfrangg pfyffend am Andreasplatz.

Wäg de vyyle Pflaschterschtai, fliegt är grad uf e Latz.

Uff em nynzää trifft sich haimlig in dr Gärbergass

S Schlagwärgg von re Gugge; iire Rütmus dä macht Spass.

Vyyl Stoff mit Noodle, Faade, zaigt Blatt zwanzig, bruucht me au,

um all die scheene Goschdym z naie fir die Moodeschau.

Fir s Fescht bim Helge ainezwanzig, loosst me kaine uss

S startet aber nur, wenn d Diirli effnesch bis zem Schluss.

D Botschaft uff Blatt zwaiezwanzig isch ganz kurz und knabb:

Lösched bitte bis am vieri alli Liechter ab.

 Latärne fange afoo lüüchte, jetzt isch s gli sowyt,

mit Helge Nummer dreiezwanzig spyyrsch die scheenschti Zyt.

Die Vierezwanzigscht Syte und jetzt isch är ändlig doo

Dr Morgestraich, wie Wiehnacht isch s – losst d Häärze heecher schloo.