Piccolo-Ensembles der KMB startet in die neue Saison

20. März 2018 | Von | Kategorie: Medienmitteilungen

D Piccolo-Ensembles vo dr Knabe- und Maitlimusyg Basel (KMB) biete junge Pfyffere und Pfyffer d Meeglgkait, sich zusätzlig zur Clique musykalysch uffem Piccolo ussztoobe, zämme scheeny Uffdritt z erlääbe und bi all däm vilicht none glai ebbys drzue z leeren uffem Inschtrumänt.

Mir mechte die Saison – die lauft normalerwyys ca vo Merz/April bis Novämber – zwai Grubbe mache:
ainy fir Jugendligy vo ca 13-16 Joor und ainy fir ca 16-20 Joor.

Mir erarbaite zämme e schpannend Répertoire vo ganz neyer und au klassischer Fasnachtsmusyg und Show-Schtigg. Mir hän au s Gligg, regelmässyg Uruffieryge presentiere z derfe.

Wär dr Plausch het am Piccolo-schpiile und Luscht zem Mitmache isch härzligg yyglaade, sich bi mir per E-Mail (gerald.pretot@piccoloensemble.ch) z mälde und au ganz unverbindligg emol in die aint oder ander Broob yynezluege und -zloose. Au Eltere und Inschtruggder sin härzligg willkomme.

Mir wäre froo, wenn Iir die Yylaadyg in Eyre junge Garde schtraie wurdet.

Dr Yyschtiig isch optimal je balder desto besser. Aber me kau au none glai schpeeter drzueschtoosse; muess denn halt aifach e glai uffhoole.

Mir broobe jewyyls usserhalb vo de Schuelferie an de Zyschtyg-Eebe vo 18:15-19:45 und 20:00-21:30 in de Ryym vo dr Knabe- und Maitlimusyg Basel (Utengasse 13).

Jetz frai my uff meegligscht vill Aafrooge.

Gérald Prétôt – Leiter KMB Piccolo-Ensemble
gerald.pretot@piccoloensemble.ch
www.piccoloensemble.ch
Tel 078 696 89 70