Fasnachtsdangg 2018

22. Februar 2018 | Von | Kategorie: Comité News

D Räppli hinterleen e Spuur.
Daas isch also Wältkultuur.
D Räppli schloofe in dr Nacht.
Zerscht gseesch du d Ladärnepracht.
Und am Vieri Punggt – nit knapp lesche d IWB s Liecht ab.

D Räppli dien dr Cortège prääge.
Dert gits mängge Räpplisääge,
denn dr Waggis findets digg
und er schwäbt im Räppligligg.
Wenn drnoo no d Gugge schränze
dien grad syni Auge glänze
und au s Pfyffe heert er guet,
wells drnääbe ruesse duet.

Hälfe dien is jederzyt
d Sanideet und d Fyrweerlyt.
D Bolizei duet alles glette
mit Yfäädler und Kadette.

Pletzlig muesch dä Räpplisääge
tonnewys go zämmefääge.
Kuum schiggt s Baudep syni Lyt,
sinn die Stroosse scho sowyt.
Goosch dur d Stadt, no froogsch du di,
isch do wirgglig Fasnacht gsi?

Die, wo hälfe, dien is gfalle.
Danggscheen saage mir drum alle.
Bis im Nynzää nimmsch e Schlugg,
noo isch d Wältkultuur scho zrugg.

S Fasnachts-Comité
Basel, am 22. Hoornig 2018