Fasnachts-Dangg 2016

18. Februar 2016 | Von | Kategorie: Comité News

Das waiss zwoor wohrschynts kuum e Gnoche
Mer hänns do s letschte Johr versproche
D Drummle darf Euch s Danggschön wirble
Euch, wo flyssig ummezwirble:
D Drämmler, d Schugger, d Füürwehrmanne
Alli dien ihr zämmespanne
Die guete Gaischter mit de Bääse
Wo s letschte Räppli zämmelääse.
D Saniteet, d Allmändverwaltig
Au s Baudep hilft ys wider gwaltig
Ass d Frau Fasnacht fröhlig lacht.
Und nit emoll dr Petrus bacht:
Dä hebbt, was Meteo verspricht
Und macht sy Laade drey Daag dicht!
Mir hänn pfiffe, gschränzt und drummlet
Sinn stundelang dur d Stroosse bummlet
Uns het die friehi Fasnacht gfalle!
Jetz nonemoll e Danggschön alle
E Dupf, e Schlepp, e letscht Doublé!
Bis s näggscht Johr!
s Fasnachts-Comité