Fasnachtsdangg 2015

26. Februar 2015 | Von | Kategorie: Comité News

S Piccolo duet d Drummle griesse:
Gäll, dr Morgestraich kasch gniesse.
Joo, er isch e woori Pracht.
D IWB hänn dunggel gmacht.
Au dr Petrus stoot do stramm.
Das Joor bringt er s voll Programm.

Unser Piccolo pfyfft froo
und es gniesst dr Cortège soo.
Stau gits weenig, drum kas bummle
guet beglaitet vo dr Drummle.
D Auge von em dien grad glänze,
wenn die Gugge richtig schränze.
Und es schetzt dä Fasnachtssääge.
Bsunders gniessts au alli Wääge.

S Piccolo duet gly begryffe,
dass es darf e Danggscheen pfyffe:
D Saniteet und d Fyrweer luege.
S Baudep kittet alli Fuege.
D Bolizei und au d Kadette,
mache alli, was si sette.
Und d Yfäädler luege gly,
dass do niemerts lätz ka sy.

S duet bim Speiholz aabetropfe.
D Räppli dien em d Lecher stopfe,
drum git s Piccolo jetz uff.
D Stroossewischer gänn ain druff
und si singe: wisch, wisch, wisch,
bis die Stadt ganz suuber isch.
S Piccolo macht noone Wangg
und pfyfft doo sy letschte Dangg!
Jetz bruucht s Piccolo sy Rueh.
S het am Bummel wider z due.

S Piccolo sait, s isch e Määrli,
mit dr Drummle bin i s Bäärli.
S goot kai Joor, mr saages aa,
denn darf d Drummle s Värsli haa.

S Fasnachts-Comité
Basel, 26. Hoornig 2015