Fasnachtsdangg 2014

13. März 2014 | Von | Kategorie: Comité News

S Räppli duet sich seer beklaage,
denn es mues jetz adie saage.
Mit em Petrus hets e Deal:
Dä haisst Sunne allewyl.

Zerscht emool saits Räppli blaich,
s bruucht mi nit am Morgestraich.
D IWB dien jo verdunggle.
Also wurd i gar nit funggle.

S Räppli sait, es goot bald loos,
lueg am Cortège wirds famoos.
D Räppli fliege, d Räppli glääbe.
Wunderbar ischs Räpplilääbe.
In e Loch gheits Räppli nit,
dorum danggts em Baudep hit.

S Räppli fliegt und isch ganz frei
dangg Kadette, Bolizei,
Fyyrweer und au Sanideet
und Yfäädler, wo me gseet.
Alli die hänn s Räppli gfrait,
dorum hets ne danggscheen gsait.

Duets am Donnschtig vieri schloo,
sait das Räppli gar nit froo.
Jetze wänn si rainige
und uns alli stainige.
S Räppli goot, s wird blitz und blangg.
S Comité sait härzlig Dangg!

Adie Räppli, s macht mr Kummer,
aber gseen i ains im Summer,
fraits mi seer, i dängg scho wyt,
s kunnt die näggschti Fasnachtszyt.

S Fasnachtscomité
Basel, 13. Määrz 2014